Review: Cooling Gel and Memory Foam Pillow مخده بارده

اذكر من فتره كتبت بانستغرام جان زين يخترعون مخده تكون طول الوقت بارده مليت وانا اقلب المخده على الجهه البارده ووحده من الفلورز قالت تنباع بامازون بس ترددت اطلبها … وبعدها بلشت ادور مخده اهم شي تكون مريحه ونسيت سالفه المخده البارده ….من يومين شفت اكاونت البغلي بانستغرام ولا حاطين بوست عن المخده البارده, وعتيجه ما صدقت خبر وطارت لي البغلي

قبل ما اخذ المخده البارده سألت الموظف شنو اكثر مخده مريحه عندهم

وراني باجي الانواع بس اصر ان المخده البارده احسن نوع عندهم الي اهي بالصوره تحت

وشريتها ب16 دينار

واول ما رديت البيت جربتها ما قدرت انطر لي ما انام…اول ما حطيت راسي عليها يتني البجيه والله صج تحبطت لي هالدرجه صعبه احصل مخده مريحه ؟

تذكرون المطارح مالوت قبل ؟ الي اسفنجه يابس كنا نتكافخ فيهم واحنا يهال؟

بالضبط نفسها !

مع ان لما اضغط على المخده بيدي تغوص بس لما احط راسي يابسه !

والبروده تقريبا بعد نص ساعه تروح يعني مافرقت عن المخده العاديه ووزنها ثقيل يعني حتى اذا بقلبها وانا نايمه طارت النومه من ثقلها

اهيا صج اهون من المخده الي قبلها بس هم ما تعتبر مريحه

اذكر اخر مره نمت وانا مرتاحه شهر 2 لما سافرت تركيا , احب مخدات الفنادق مريحه لا يابسه ولا لينه 😥

الزبده من الموضوع كله …دلوني على مكان عنده مخاد مريحه ابي مخده راسي يغوص فيها بدون ما تعور الرقبه واقوم من النوم وانا مرتاحه مو مستعسره 😥

Personal Trainer @fitmiss_kw

من قبل اسبوع جربت

fitmiss

بتكلم بشكل عام لان ما اقدر احكم على تمرين مدته ساعه

بالنسبه للوقت كانت ملتزمه بالوقت ووصلت قبل الوقت الي متفقين عليه ب5 دقايق

  والتدريب بالنسبه لي كان عادي لان تعودت على تمارين الكروسفت يمكن لو كان في تنويع اكثر بالتمارين الوضع يصير احسن ,بس اكيد في ناس يفضلون تمارين البيلاتس راح يعجبهم

اسعارهم

power training 150 kd \ 10 session (180 kd \12 session)

Pilates 200 kd \ 10 session (240 kd \ 12 session)

3 times a week and each session = 1 hour

واذا تبون قروبات السعر يصير ارخص

instagram: @fitmiss_kw

website: www.fitmiss.net

 

Trip To Istanbul Part 1\ تركيا-إسطنبول

بعطله الربيع شهر 2 سافرت تركيا

طبعا الحجوزات (الفندق والتذكره) عن طريق موقع اكسبيديا

 رحلتنا كانت على الطيران التركي لمده 9 ايام بس تمددت لي 12 يوم بعدين اقولكم ليش 😛

والفندق حجزنا بإسطنبول في منطقه تقسيم فندق نيبون

Opalescence PF تبييض الاسنان المنزلي

سألت اكثر من دكتوراسنان عن احسن نوع تبيض كلهم مدحولي المنزلي لان معترف فيه وعليه دراسات و ضرره اخف من الليزر وتبيضه طبيعي واقدر اتحكم بدرجه التبييض ودلوني على الوكيل الي يبيع الماده بالكويت

كنت مسويه تقويم اسنان بمستشفى الاميري واول ما شلته عطيت الدكتوره الماده وسوتلي القالب حق التبيض وتقريبا بعد 3 ايام استلمت القالب ومن اول يومين استعمال بين الفرق معاي

تحصلون ماده التبيض عند شركه التقدم التكنولوجي ,سعر العلبه الكامله مع القالب 13 دينار (8 إبر) و اذا عندكم القالب وبس تبون الابر يبيعونهم ب5 دنانيير (4 إبر) الابره الوحده تكفيكم حق مرتين

اتوقع هذا ارخص مكان بالكويت يبيعهم لان دقيت على اغلب العيادات الخاصه اسعارهم تبلش من 70 دينار لي 250 دينار وكلهم يستعملون نفس الماركه, طبعا اهم حاسبين فتح الملف والاشعه والتنظيف وسعر الماده وشغل الدكتور وكل هذا ما تحتاجونه اذا اسنانكم اساسا نظيفه وما فيها جير

عندهم اكثر من نوع , انا دايما اخذ 35% لان ما يطول بس نص ساعه واشيله بس الي اسنانهم حساسه ماراح يتحملونه اخذوا الي نسبته اقل, بعد التبيض بفتره اسناني شوي صارت حساسه مو وايد بس الحين الحمدالله ردت طبيعيه

رقمهم 22247165 ومكانهم بمجمع تالا السالميه

My Bucket List: Things to do before i die

If you don’t have a bucket list, I highly recommend you to create one. If you already have your list, take this opportunity to review it. See if there are new items you want to add-on.

1- Horseback Ride in the Ocean

Half Moon Cay, Bahamas photo by Jim Robertson

Wish list: Ride a bike ✓

واخيرا من بعد 23 سنه الا شهرين بتعلم اركب قاري بو تايرين 😛

هابي نيوو يير …ألفين واربعتش

 ولهت عالبلوق صارلي فتره ما ادري عنه

السنه الي طافت اعتبرها سنه انجاز بالنسبه لي الحمدالله وانشالله السنه اليديده احقق انجازات اكثر واكبر

كل عام وانتوا بخير وعساها تكون سنه خير عليكم وتحققون كل الي ما قدرتوا تحققونه ب2013  😀

Wish list: Scuba diving experience

بعطله عيد الاضحى كنا مخططين نسافر بس الله ما كتب لنا وبدال ما اضيع اجازه 9 ايام بمطاعم ونوم وسوق اشتركت مع

Bubbles Diving Center

دورة تدريب غوص لمدة اسبوع

شهادتهم معترف فيها عالميا ومعتمده من منظمه

 NAUI

وعشان ناخذ الشهاده والليسن لازم نكمل 4 غوصات

اول يومين من الدورة محاضرات بمركز الصبيح  مع المدرب عبدالرحمن العنيزي عن المعدات والاحتياطات والمخاطر الي ممكن تصير وشلون نتجنبها

ثالث يوم تدريب بالمسبح مع المدربه العسل دلال العمر

رابع يوم غوصتين بجزيره قاروه

طبعا ما تقارن غوصة المسبح بغوصة البحر الوضع كان يخرع  اكثر من المسبح واكيد ضغط الماي اقوى بس استمتعنا   😀

Five amazing skin care products

1-     سيتافل: مرطب للوجه, احبه احبه احبه يرطب الويه عدل بدون ما يخلي شكل الويه دهني

2-     بايوديرما: مزيل مكياج , انا بشرتي حساسه من استعمل مزيل المكياج الكلينكس ويهي يحرقني وعيني تحرقني من كثر مايحطون فيه عطور , بيوديرما طبي اكثر مايحسس البشره ولا يحرق العين وينظف العين من ماسكرا ضد الماي بسهاله بدون مايطيح الرموش

3-     كلارنس: مرطب لليد ومقوي للاظافر, ما يطلع من جنطتي من كثر ما احب ترطيبه بالذات بالشتا

4-     كلارنس: غسول للوجه,  ينظف الويه بذمه وضمير بالذات بعد المكياج

5-     أفين: حمايه من الشمس والاشعه الضاره , البشره بسرعه تمتصها ومايخلي الويه يدبق نفس باجي الانواع وعندهم بعد غسول للويه حلو

هالخمس منتجات صارلي سنين ما استغني عنهم وما حصلت احسن منهم لي الحين , شنو افضل منتجات البشره الي جربتوها وما تقدرون تستغنون عنها ؟

Qatar trip part 3 دار آل ثاني

اول شي السموحه وايد طولت على ما كملت الموضوع بس تبون الصج عندي وايد صور من السفره وكل مره انشغل ومايمديني افرزهم واعدلهم ,هاليومين انشاءالله بخلص من موضوع قطر عشان احط لكم موضوع سفرتي لمسقط 🙂

–

قبل ما نوصل قطر وحتى لما وصلنا قطر الكل كان يقولنا ضروري تروحون تشوفون متحف الفن الاسلامي , بصراحه ما كنت متشوقه لاني ما احب المتاحف بالذات اذا بدوله خليجيه لانه متحف بدوله خليجيه يعني قاعه صغيره وظلمه واشياء ممله مو على مستوى المتاحف الاوروبيه للاسف مافي اهتمام بالمتاحف عندنا

اول ما وصلنا فهمت ليش الكل قالي روحي, ببساطه عباره عن تحفه فن معماري مو بس متحف لعرض النوادر , عمار يا قطر  🙂

تصميم المبنى اسلامي مودرن حده عجيب والي عرفته ان الي مصممه نفس المهندس المعماري الي صمم متحف اللوفر في فرنسا

@dietcenterkw last week

الاسبوع الاخير مع دايت سنتر سافرت العمره ووقفت اكثر من مره وصار لخبطه بالوجبات  وما نزلت حتى ربع كيلو

وبصراحه انا ما جربت غيرهم فما اقدر اقارنهم مع الشركات الثانيه من ناحيه الطعم والخدمه بس من ناحيه السعر الي لاحظته يعتبرون الاغلى

خلصت الاشتراك شهر 2 و نزلت بحدود 4 كيلوات والحمدالله وزني ثابت لي الحين اذا كلش كلش ازيد نص كيلو وارد انزله بس مو معناته اني ماخذه راحتي بالاكل بالعكس عدلت من اكلي 😀

الي عجبني:

-كل الاكل البحري الي ذقته لذييييذ والاهم ما فيه زفره

-اي طبق مع طحينه لذيذ ضروري تجربونه

Blog Updates: Free ad banner

من قبل فتره تكلمت عن هالشي بالأنستغرام بس لي الحين توصلني ايميلات دعايات فحبيت اثبت الموضوع هني…

اول ما بطلت المدونه وانا هدفي الاساسي اني استانس واضيع وقتي بشي احبه او اكتب رايي الشخصي بمنتجات جربتها و اتحلطم او اشاركم بجزء من حياتي

الي قاعد يصير حاليا اغلب المدونات صارت تجاريه حتى الي توهم بطلوا مدوناتهم “البعض” هدفهم تجاري بحت وبس ينزلون بهالاعلانات والدعايات حالهم حال جريده الوسيط وهالشي راجع لهم , والي عندهم مشاريع يبون يعلنون عنها سيدا يروحون للمدونات لانهم خذوا فكره ان كل المدونات = دعايات

 عن نفسي اسمحولي ما راح احول مدونتي لي جريده الوسيط  بدون ما اكتب رايي الشخصي بالمنتج او المعرض بدون ما اروح له!

وعشان ما تحرجوني ولا احرجكم حطيت مساحه اعلانيه “بدون مقابل” للمشاريع الكويتيه الصغيره فقط كنوع من الدعم وعشان ما اردكم كل مره 🙂

الشروط

–        صاحب المشروع كويتي الجنسيه

–        مشروع صغير ” يعني لي الحين ما عندكم محل”

–        الاعلان يشمل المدونات او المواقع اليديده ويشمل المعارض المنزليه

مواصفات الاعلان

– مقاس 200x 300

– الاعلان يحتوي على الموقع او رقم التواصل

– صيغه الاعلان GIF or PNG

– ارسال الاسم والبيانات على ايميل المدونه

3ateeja@gmail.com

فترة الاعلان تتراوح مابين 3-4 لي اربع اسابيع عشان المشاريع الثانيه تاخذ نصيبها 🙂