Qatar Trip Part 2 دار آل ثاني

باليوم الثاني بسفرتنا لقطر ما كنا مقررين وين نروح , قعدت الصبح على هالفيو الحلو شربت قهوتي وبعدين نزلنا الريسبشن وسألنا عن الاماكن السياحيه بقطر …طلع الفندق نفسه ينظم رحلات سفاري حده كان بخاطري اروح بس حسافه مشكلتهم ما يطلعون قروبات بس احنا والي يسوق فينا مو نظام قروبات نفس دبي …اخر شي اتفقنا نروح الاماكن القريبه نخلصهم مثل المتحف الاسلامي والسيتي سنتر وغيره

صوره ثانيه حق الفيو بس بانورما مصورتها بالايفون عشان جذي مو واضحه الصوره عدل بعد ما اتفقنا على الاماكن الي بنروح لها , نزلنا نتريق بالفندق

هالشي اللذيذ مادري شسمه , مسكين اكثر من مره قالي اسمه ونسيت , اهو نفس طريقه الرقاق بس يحطون طحين ذره بدال الطحين العادي والمفروض انه مع حميسه بطاط بس بما انها متروسه بصل ودهن قتله يسويلي حلوم

القعده داخل  صح حلوه بس برا وايد احلى والجو كان حلو الصبح براد

هذا المطعم من برا, خلصنا ريوقنا وتمشينا حوالين الفندق على ما المجمعات والمتاحف تبطل  

اول شي رحنا المتحف الاسلامي لانه اقرب شي للفندق, وصلنا ولا مسكر اليمعه ما يبطلون الا 1 الظهر , كلمنا سايق التاكسي وقالنا اوديكم كتارا مبطل هالحزه

وصلنا كتارا وكان المكان حده صخه , اهوا اساسا لي الحين ما اكتمل كله مبطلين نصه , عبارة عن كافيهات ومطاعم وقعدات عاليال والعاب مائيه  وفي قاعات حق المعارض الفنيه ومسرح روماني يسون فيه حفلات بين فتره وفتره

اول ما توصلون تاخذكم سياره غولف وتتمشى فيكم توريكم المكان

كان في معرض رسومات للرسام يان باي مينغ , كل رسوماته عن شخصيات تاريخيه اثرت بالعالم رسمه عجيييب مشالله مهاتماغاندي

تشي جيفارا

صدام حسين و ريله الجلحه 😛

المسرح الروماني

مادري شقصتهم ما قريت شنو مكتوب بس حدهم يشوقون 😀

خلصنا من كتارا المكان حلو بس ما طولنا فيه لانه اغلبه مطاعم وما كنا يواعه , لازم تروحون وانتوا يواعه قعداتهم الي عاليال حدها تينن 😀

قبل ما نسافر قطر قالوا لنا جوهم بارد وانا واختي جهزنا بوتاتنا تكرمون وبلوفراتنا ما خذينا ولا شي صيفي كله شتوي واخرتها متنا من الحر الله يسامح الي قالت لنا برد 😛 ,  جوهم ربيعي مو مال البوتات الي يايبينها معانا

رحنا السيتي سنتر ندور لنا تكرمون فلاتات بدال هالبوتات  😀

اكثر شي عجبني ان شوارعهم منظمه, مدخل التاكسي غير عن مدخل السيايير العاديه 

الستي سنتر من داخل

بعد ما خلصنا من سيتي سنتر رحنا اللؤلؤة, اهوا عباره عن جزيرة صناعية فيها ابراج سكنيه و مجمع صغير ومطاعم ,الابراج السكنيه لي الحين تحت الانشاء بس المطاعم والمجمع مبطلين

عندهم تأجير يخوت بس لهم اوقات عمل معينه مو دايما موجودين

المجمع من داخل, حده عجبني الكرسي يشوق

 😀 لي هني خلص يومنا الثاني بقطر , اذا ما شفتوا اليوم الاول ضغطوا على هاللنك ..وانشالله اليوم الثالث والرابع انزلهم بأقرب وقت