بالاسبوع الثاني نزلت الكالوريز لي 1000 كالوري بدال 1200 والفرق العشاء صار نص الكميه
اليوم الاول
الريوق: مناقيش زعتر ,حلو وخفيف
الغداء:سمك مشوي بصلصه الطحينه واايد عجبني طعمه لذييذ ,والسلطه كانت سلطه الموزاريلا طعمها عادي
السناك: كيك الموكا, ما حسيت بطعم الموكا وااايد حاليه
العشاء:شرائح الدجاج بالبلسميك واقراص البطاطا , كان وايد ناشف وكلش ما حسيت بنكهه البلسميك ما عجبني وايد والي حبطني اكثر كان معاه بصل مع اني كاتبه مابي بصل وعالعلبه من بره مكتوب بدون بصل, والشوربه كانت شوربة بطاط ادمنت عليها
اليوم الثاني
الريوق: دانيش قرفه “دارسين” ما حسيت بطعم الدارسين كلش اتوقع لو يزيدون كميه الدارسين يصير ألذ
الغداء: سلطه قيصر حلوه وخفيفه , والوجبه الرئيسيه كانت دجاج بخاري ما عجبني وايد العيش كان حييل لين وملزق بس بهاراته حلوه
السناك: بلاك فورسيت خلصته بلقمة وحدة 😛
العشاء: شوربه عدس لذيذه مع فطيرة بطاط حلو طعمها بس ناقصها روزميري او اوريغانو 
اليوم الثالث
الريوق : المفروض مناقيش زعتر وجبنة بس وصلني مناقيش زعتر سادة بالغلط 😦
الغداء: كبة باللبن طعمها عادي , سلطه باستا قلت لكم عنها من قبل احبها خفيفه عالمعدة
السناك: فطيرة تفاح حلو طعمها بس انا زدت عليها دارسين
العشاء :شوربة ذرة لذيذة, مع صمونه تيركي خفيفه بس لو يزيدون عليها ماسترد تصير ألذ لانها ناشفه شوي 
اليوم الرابع
الريوق: كلوب ساندويش احبها ترفه وهم قلت لكم عنها بالاسبوع الاول
الغداء: سلطة فتوش حلوه بس حامضه وكميه السماق الي فيها شويه , مع بيني أرابياتا حلوه بس يبيلها رشة ملح زيادة
السناك: كوكيز ككاو طعمها زوين لا باس فيه
العشاء:فاهيتا دجاج كانت ماصخه وناشفه لو حاطين فيها صوص بدال جبن موزيريلا تصير انطع 
اليوم الخامس
الريوق: مافن ككاو لذييذ
الغداء: سلطه خرشوف حبيتها خفيفه, مع كفته بالطحينه والرمان حدهاااا نااطعه ولذيذه
السناك: كيك اسفنجي عادي طعمه لو يزيدون كميه المربى بدال الكريمه يصير ألذ
العشاء:شوربه دجاج بالكريمه مالحه ولذيذه حبيت ملوحتها , شاورما الدجاج واااايد واايد ناشفه ما تنبلع بروحها ناقصها طحينه والعشاء المفروض يوصلني نص الكميه لانه نزلت الكالوري لي 1000 بس الكميه وصلت كامله مادري ليش 
اليوم السادس
الريوق: شابورة مع لبنة وزعتر
الغداء:شرائح اللحم بصلصه المحار حلو طعمه بس كميه الصوص وايد ,مع سلطه الخس والجوز صلصتها نفس سلطه الخرشوف وكميه الجوز حيل شويه
السناك:موس الككاو لذييييذ
العشاء: شوربة البروكولي لذيييذه حبيتها, وباستا الزيتون بصلصه الطماط خفيفه وحلوه
اليوم السابع
قبل ما اكمل الاسبوع الثاني وقفت اشتراكي لانه كنت بسافر واذا بتوقفون لازم تبلغونهم قبل الموعد بيومين
سافرت ورديت ووصلني صندوق الاكل اول ما بطلته تنحت واصلني اكل مكرر يعني ما كملوا وين وقفت لا, وصلني نفس منيو اليوم السابع بالاسبوع الاول
كلمتهم وطلع عندهم طريقه حسبه معينه للايام يمشون عليها
اذا وقفتوا اشتراكم وبغيتوا تردون اول شي تسونه روحوا لهم وتاكدوا من المنيو عشان لا يوصل لكم اكل مكرر مثل ما صار فيني
المهم بما اني سافرت قطر احم خذيت راحتي بالبلعه وما خليت شي بخاطري بس الحمدالله ما زدت ولا غرام ووزني ثبت 😀
اذا ما شفتوا الاسبوع الاول ضغطوا على هاللنك
اقتراحات
اتمنى انهم يشددون اكثر على المطبخ اوكي انا يمكن دعله بالأكل واشياء وايد ما احب اكلها بس الحمدالله ما اتحسس منها بس اعرف ناس وايد عندهم حساسيه من صنف معين مثلا ” المكسرات” واذا كلوا نتفه بالغلط لازم بسرعه يروحون المستشفى وياخذون ابرة , بالاخير بني ادم عادي يغلط بس عالاقل يصير في شخص ثاني يجيك عالاكل قبل لا يصكرون العلبه عشان يتفادون الاغلاط
الشي الثاني انا قبل ما ابلش معاهم قطعت كل شي ابيض ” عيش , خبز ,معكرونه” بس من اشتركت معاهم رديت اكلهم ,ياريت يغيرون اي شي ابيض عندهم لي دقيق قمح كامل ادري اثنيهم نفس الكالوريز بس صحيا القمح الكامل وااايد افيد للجسم اذا صعب يطبقونه عالاقل يخيرون المشترك اذا يبي قمح كامل ولا ابيض
انزين ما عرفنا جم كيلو نزلتي لي الحين بدون ذكر الوزن فقط بس جم نزلتي
حبيبتي انا كاتبه جم نزلت بنهايه كل بوست 🙂
Pingback: @dietcenterkw last week | 3ateeja's Blog