@Kuwaitna_Gov لقاء المدونين مع وزراء الكويت

وجهة لي دعوة من حساب حكومة دولة الكويت في تويتر المعروف ب “كويتنا” لحضور لقاء مع الوزراء أنس الصالح ومحمد العبدالله ونايف الحجرف للحديث عن اهميه الاعلام الرسمي والغير رسمي في تنمية وتطوير الكويت…على اني كنت مشغوله وبسافر اليوم الي بعده بس ضغطت على نفسي ورحت لانه كان في بالي كلام وايد بقوله لهم بس للاسف تمنيت اني مارحت وضيعت وقتي

بالبدايه دخلت ومالقيت مكان اقعد فيه وضليت انا ومجموعه من زميلاتي المدونات فتره واقفين بدون محد يعبرنا ويقولنا تفضلوا او يدبر لنا مكان نقعد فيه لما كلمنا موظفين “كوفي بين” وضبطوا لنا طاوله وكراسي

ثاني شي حلو انها تكون قعده اخويه وملمومه بكافيه بس مو لي درجه الوزراء معطينا ظهورهم , انا عن نفسي ما شفت حتى ويوهم القعده كلش ما كانت مرتبه, الوزراء قاعدين بالنص والناس حوالينهم كانوا المفروض يختارون مكان مناسب لعدد الحضور او عالاقل يرتبون الكراسي

ثالث شي فوق ما ان المكان مصكر وزحمه ,واحد من الوزراء المدمنين على التدخين ما قدر ينطر لما يخلص اللقاء معانا عشان يدخن ! حسيت اني قاعده بدوانيه مو لقاء مع وزراء

رابع شي بصراحه لي الحين ما فهمت الهدف من اللقاء بالبدايه توقعت ان الحديث راح يكون عن عن دور الاعلام ووسائل التواصل الاجتماعي ودورنا كمدونين في تمنيه وتطوير الكويت مثل ما كان مذكور بالدعوه ,بس للاسف الي صار من قبل بعض الاعلاميين استغلوا فرصة وجود الوزراء عشان يتكلمون عن الوضع السياسي بدل ما يتكلمون عن التنميه او يعطون اقتراحات تفيد الديره

خامس شي انصدمت من جرأة بعض المصورين والصحفيين الموجودين ارتزوا جدامنا ويصورنا بدون اي اذن مسبق كل شوي نأشر لهم لا تصورون ويردون يصورون مع العلم ان بلغونا اللقاء بعيد عن الصحافه ووسائل الاعلام الرسميه ومافي تصوير

سادس شي على ان اللقاء كان خاص للمدونين بس ما حذينا حقنا ,بالذات الحضور النسائي كان وجودنا وعدمنا واحد المايك كان بيد الاعلاميين وما عطونا فرصه نتكلم وفضلت اني انسحب من المكان بعد ما شفت الوضع جذي

فكرة لقاء الوزراء مع المدونين في مكان عام وبدون رسميات كانت حلوه  وايجابيه واشكرهم عليها بس للاسف فشلوا بالتنظيم وإدارة الحوار

اتمنى يتكرر هالنوع من اللقاءات بس ان يكون بالمستوى المطلوب وبعيد من الصحافه التقليديه