@dietcenterkw week one

اشتركت مع دايت سنتر لمده 4 اسابيع  وانشالله راح احط بوستات إسبوعيه ما راح اترس البلوق 28 بوست كل يوم شنو كليت !! صح البوست راح يصير طويل بس جذي أحسن وأرتب
المهم دقيت عليهم وخذيت موعد وطلبوا فحص دم وعلى اساسه يحددون نوع البرنامج الغذائي والحمدالله كل شي عندي طبيعي فأشتركت ببرنامج

Best Life Diet

عبارة عن

الريوق: الوجبه الرئيسيه و تختارون معاها, لبن – عصير- حليب

سناك 1: تختارون ,سلطه فواكه -فاكهه – روب – روب مع فواكهه

الغداء: الوجبه الرئيسيه مع سلطه

سناك2: تختارون نوع من حلو

العشاء: الوجبه الرئيسيه مع شوربه

–

بما اني مشتركه نادي وقاعده ألعب رياضيه يوميا اللأخصائيه حددت لي 1200 سعره حراريه باليوم

 سناك 1 اخترت يكون دايما سلطه فاكهه بدال الفاكهه العاديه لانه مرات يحطون لي نوع فاكهه ما أحبه أو صعب أخذه معاي لما أطلع مثل البرتقال او الأفندي فما راح اكرر صور سناك 1 بالبوستات اليايه

–

 اليوم الاول

ريوق:مافن بلوبيري مع حليب قليل الدسم ,حبيت المافن خفيفه بس نتفه متعوده على مافن كاريبو شكبره 😛

الغداء: سلطه كول سلو والطبق الرئيسي ربيان مع عيش مقلي “فرايد رايس” اثنينهم كانوا لذيذين

سناك 2 والعشاء للأسف كنت برا البيت فما صورتهم , السناك كان كرات الشوكولا غرامي حده لذييذ والعشاء كان شوربة دياي بالكريمه كانت مالحه شوي وصمونه سيزر دياي كانت حيل ناشفه بالغصب تنبلع

–

اليوم الثاني

الريوق: دونات ككاو , اهيا زوينه بس ما تقارن مع دانكن دونات او كرسبي كريم لانها مخبوزه بالفرن مو مقليه فكانت العينه ناشفه جنها عينه صمون مو نفس الدونات الي متعودين عليه

الغداء: سلطه يونانيه كانت خفيفه بس الي ما عجبني الزيتون كان مع بذره والخيار والفلفل كانوا حيل قطع كبار بس الصوره بعد ما قصصتهم عشان اقدر أكل مع التقويم 😛الوجبه الرئيسيه : دياي وخضار بصلصه الطماط مع كسكس , لذيييذه  كان معاه قرع أنا الي ما أكل قرع كليته

السناك: كيك فراوله بجوز الهند ” لذييييذه” حدها ترفه

العشاء: شوربه بروكولي بالكريمه “لذيذه”

الطبق الرئيسي: ريزوتو الربيان , اهوا حلو بس ما أعتبره ريزوتو حاطين جبن موزاريلا بدال الكريمه

–

اليوم الثالث

الريوق:كريب ككاو, ما عجبني وايد

الغداء:سلطه الباستا أكثر سلطه حبيتها

الوجبه الرئيسيه لحم العجل بالليمون حده ناااطعالسناك: تشيز كيك بالتوت البري كان حلو بس الكراميل ألذ

العشاء: دجاج على الطريقه الصينيه ” موذاك الزود حسيت مترسينه نشا او جيلاتين الي مخليه لزج وقطع قطع”, شوربه البطاط كانت حلوه

–

اليوم الرابع

الريوق: سندويش بجبنه الفيتا والخيار

الغداء: سلطه هيليون وخرشوف مع صلصه الماسترد خفيفه وحلوه

الطبق الرئيسي كوسا باللبن لذيذه

سناك: كيك البسكويت حلو وترف

العشاء: شوربة الدياي بالشعيريه ما عجبتني كلش وما قدرت أكملها طعمها شوربة طماط مو شوربه دياي

الطبق الرئيسي : لازانيا اللحم حدها عجيبه

–

اليوم الخامس

الريوق: أومليت بالأعشاب مع نص خبزه سمره, كلش ما حسيت بطعم الاعشاب بس اسمه بيض يعني عادي ينوكل بكل الحالات 😛

الغداء: روبيان حامض حلو عجبني طعمه بس أحس الصلصه يبيلها حلات أكثر

سلطه التاكو الكميه كبيره”خس وجزر” بس الصوص وكميه البينز حيل شويه حلات التاكو بالبينز و وكانوا مستعملين لبنه بدال الكريمه الحامضه بس ما كان فيها نكههالعشاء: شوربة عدس ” لذيذه” ,الطبق الرئيسي بروشيتا بالموزاريلا والريحان بالعاده البروشيتا يستعملون خبز فرنسي محمص بس اهما استعملوا صمونه سمره عاديه قاسمينها بالنص ” بالصوره انا مقصصتها اصغر” طعمها كان جدا عادي

–

اليوم السادس

الريوق: كلوب ساندويش لذييذه فيها روست بيف حبيتها

الغداء: مجبوس دياي , لما قريت مجبوس دياي تخيلت الديايه تلق لق وتقطر دهن وفخذ مقلي منسدح على كتر يقول تعالي أكليني بس يوم شفته بالصج نفسيتي تعبت طلع قطع صدور دياي مو نفس الي تخيلته بس مو معناته مو حلو ,لا حلو طعمه بس مو نفس المجابيس الي متعوده عليهم  😛

سلطه الذره ما شبعت منها لذيذه

سناك: اكلير حدهااا مو صج تررفه وتينن

العشاء:دياي بالخضار وقطع الحبش مع الكسكس, الصوص لذيذه طعمه سموكي بس انصدمت ان في مشروم مع اني قايله لهم مابي مشروم  مااا احبه ,وهم كاتبين عالعلبه من برا بدون مشروم بس وصلتني مع مشروم 😦

الشوربه اللحم والارز, بصراحه كانت دقه طعمها مرقة لحم مو شوربه

–

اليوم السابع

الريوق:وصلني غلط كنت مختاره كريب فراوله وصلني ككاو مره ثانيه فما صورته

الغداء: سلطه طماط محشي بالجبنه كانت خفيفه وحلوه

الطبق الرئيسي روبيان مع نودلز بالنكهه الشرقيه , مع ان حسيته صيني مو شرقي بس حلو طعمه

سناك: كيك فانيلا, طعمها عادي

العشاء: دياي بالكاري مع عيش بالمكسرات , عجبني طعمه حلو

شوربه شعيريه: هم ما عجبتني , طعمها وااايد طماط

لي هني خلصت الاسبوع الاول ونزلت فيه تقريبا كيلو ونص

الاكل بشكل عام كان لذيذ بس الشوربات مو ذاك الزود

والكميه كانت حيل كبيره بالنسبه لي ما كنت اقدر اكمل أكلي مو متعوده أكل 5 وجبات باليوم كنت بس الغدا الي اكل عدل وباجي اليوم تنقنق وخرابيط

كلمت الاخصائيه وانشالله من الاسبوع الثاني راح تقللي الكميه لي 1000 كالوري-

الي عجبني بدايت سنتر عندهم وايد برامج تغذيه مثلا حق الي فيهم سكري او كوليستيرول او الي يبون بس وجبات رئيسيه بدون سناك ,تقدرون تقرون اكثر عن أنواع برامج التغذيه بموقعهم