تعلمت ؟

الروضه:

1-    تعلمت اول ما ادش الصف اقلب الكرت الي عليه اسمي عشان تعرف الابله اني مداومه

2-    تعلمت اصف قطار وامسك حزام البنت الي جدامي لي ما اوصل لي الكافتيريا

3-    تعلمت اشرب حليب كيدي كاو الي كانت علبته مربعه وبطعم الككاو الي كله شكر وألوان صناعيه وصمونه الفيصل مكتوب عليها جبن بس فاضيه  كلها عيين “عجين”

4-    تعلمت اروح عند ابله “إحسان” اخذ منها ككاو ماكنتوش

5-    تعلمت اروح حق الناظره لانها تحبني وتعطيني الحلاو الي يطقطق

6-    تعلمت اخش اغراضي عشان بو رزيقه ما يخربهم

7-    تعلمت ارسم شخابيط والابله تصفق لي

8-    تعلمت اروح المكتبه والابله تعطينا قصص وتقول يلا اقروا واحنا ما نعرف نقرا شي

9-    تعلمت قصه ليلى والذيب

10- تعلمت اروح الروضه بس عشان نلعب

11- تعلمت بطابور الصباح كل يوم يحفظوني الايام ونرقص

12- تعلمت بالصيف نلبس أبيض بأزرق وبالشتا احمر برمادي

13- تعلمت احفظ اغنيه يا اطفال يا حلوين اشربو الحليب\ خروفي ماع ماع \والنشيد الوطني نصه لانه التكمله مو مهمه

الأبتدائيه:

1-   تعلمت انا عبير وانا سالم , انا اكل واختي تشرب

2-    تعلمت بحصه البدنيه البس هدومي وأقعد ما اسوي شي لانه اذا ما يبت هدومي الابله تعاقبني وتخليني واقفه على ريل وحده طول الحصه

3-    تعلمت ادش الزهرات لانه يودون رحلات ووناسه

4-    تعلمت لازم ما اجاوب عناد على الابله اذا ما قومتني لانها راح تستدعي ولي امري”😐 شسوي ابي اقرا ما تخليني اقرا”

5-    تعلمت ابله فاتن مالت الرياضيات تخرع وبيدها مسطره كله تصارخ

6-    تعلمت ABCD انكسرت ايدي رحت الطبيب….

7-    تعلمت احفظ المقدمه مالت الاذاعه المدرسيه وكل يوم اقولها

8-    تعلمت شركة معجون سيجنال يوزعون علينا حبوب ورديه صغيره تصبغ الاسنان ولي الحين مادري شنو فايدتها

9-    تعلمت بعد ما تخرجت الاولى على المدرسه مو مهم احفظ جدول الضرب لما اكبر في آله حاسبه

10- تعلمت لازم البس شريطه بيضا على شعري ولا الوكيله تزفني

11- تعلمت اكل المقصف كله محزر ويعور بطني

12- تعلمت ارسم خرايط برابعه ابتدائي

13- تعلمت ان العراق غزو الكويت بسنه 1990 واهما اعدائنا

14- تعلمت القصر الاحمر لونه مو احمر

15- تعلمت مو لازم احفظ كل حكامنا لانه الابله بس بتسأل منو الحاكم الي وضع الدستور ومنو اول حاكم ؟

16- تعلمت الابله تعطيني صفحه طويله تقولي نسخيها بالبيت وارد البيت ابجي ايدي تعورني من النسخ

17- تعلمت انه بوكيمون حرااام “لول”

18- تعلمت شلون اجلد كتبي

بالمتوسطه:

1-    تعلمت ان برنامج السلحفاة سخيف واقدر ارسم الزخارف بالمسطره

2-    تعلمت شلون افرق بين جمله اسميه وفعليه

3-    تعلمت انجليزي وعربي مكسر لانه ابلتنا مو كويتيه

4-    تعلمت لازم استعمل قلم حبر مو رصاص لاني كبرت

5-    تعلمت ادش مع الاخصائيه ونسوي انتخابات كل سنه وانا الي افوز ومانسوي شي بس اسمه فزنا

6-    تعلمت شلون اسوي دقات بأبلات الرياضيات

7-    تعلمت شلون اعزف لحن فيروز نسم علينا الهوا بنشاط الموسيقى

8-    تعلمت المقدمه الي كنت اقولها بطابور الصباح بالابتدائيه نفسها لازم اقولها الحين

9-    تعلمت اشتري اغراض رسم غاليه والابله تاخذهم

10- تعلمت ابله الرسم ترسم لوحه وتاخذني معرض وتقولي قولي لهم انتي راسمتها

11- تعلمت بعد كل رحله لازم نحن علي الابله تودينا ماكدونالز

12- تعلمت لازم ما اقص شعري بوي عشان لا ينادوني شجون البويه

13- تعلمت بحصه العربي لازم كل اسبوع اروح المكتبه العامه واطبع صفحات من الكتاب والزقهم بالدفتر والابله تحط صح بدون ما تقرا

14- تعلمت شلون اسطر دفاتري واحط ستيكرز

15- تعلمت بحصه الاحتياط لازم نسولف ونقرق والابله تصرخ تسكتنا

16- تعلمت لما موجهه او ناظره ادش الصف الابله يصير شرحها مفهوم

17- تعلمت ان خلاص طاح الحطب والعراق اخواننا واشقائنا ومو لازم يعلمونا شنو صار بوقت الغزو

بالثانويه:

1- تعلمت ان لازم ما نسوي مظاهره لانه موعاجبتنا الوزيره عشان لا اوقع على تعهد

2-تعلمت اول 10 دقايق من الحصه نكون واقفين برا الصف على ما تشرف الابله واول ما تشرف ما تشوف الا غبرتنا

3-تعلمت ثاني 10 دقايق الابله تصرخ ليش واقفين برا الصف

4-تعلمت ثالث 10 دقايق الابله مو عاجبها ترتيب الطاولات تبيهم حرف ال U

5-تعلمت رابع 10 دقايق الابله تقول وين وصلنا اخر مره ؟ وأول ما تنطق يطق الجرس

6-تعلمت لو شنو اسوي ما اراح افهم كيميا من ابلتنا والمدرس الخصوصي احسن منها

7- تعلمت كل الي ندرسه بالاسلاميه ما يطبق بالواقع

8-تعلمت الابله لازم كل مره توقفني على البنات على ما تخلص ريوقها او سالفتها مع الابله الثانيه

9- تعلمت ان حق حفله التخرج لازم نحط حطيه ونسوي لنا حفله مع انه وزارة التربيه تخصص مبلغ وقدره كل سنه لحفلات التخرج

10. تعلمت ماله داعي احفظ تواريخ لانه البنات مبرشمين كل شي عالطاوله مشالله

11. تعلمت ما احفظ شعر لانه طويل واخرتها يبون بس بيت شعر واحد !

12. تعلمت ما ادرس امتحان العربي لانه الابله بتغششنا كل شي

13. تعلمت الابله تجهز كل شي بعدين ادخلني اولمبياد الاحياء والكيميا والفيزيا والحاسوب واقدمه بإسمي

14. تعلمت انه يوتيبوب يفهم احسن من الابله

15. تعلمت كل يوم بطابور الصباح الابلات يجيكون على اظافرنا وجواتينا , بس دايما الابله تكون اظافرها اطول من اظافري وتزفني مادري ليش ؟

15. تعلمت اسوي وسيله او اطبع اي بحث من قوقل او ويكيبيديا والابله تعطيني 5 درجات

16. تعلمت بأخر سنه في بنات ياخذون امتحانات مسربه من مدارس الشباب يعني ماله داعي ادرس

17. تعلمت كل ما ادش مرحله دراسيه الابله لازم تقولنا انتوا اسوء جيل مر علي

18. تعلمت لما اسأل الابله سؤال ذكي تتوهق وتقول انتي دوري على الاجابه وبلغيني

19. تعلمت اذا في اجازه ما اداوم قبلها بيوم وما اداوم بعدها بيوم

20. تعلمت كل ما تكون في اجازه قريبه الابله تعصب ليش مداومين غيبوا ما نبيكم !!

بالجامعه:

1-    تعلمت كل الي درسته بالثانويه نفسه رديت ادرسه بس بالانجليزي

2-    تعلمت مو مهم اصير من مرتبه الشرف لانه لما اتخرج حالي حال الي ما تدرس اثنينا نفس الوظيفه ونفس المعاش

3-    تعلمت اروح نهايه الكورس اساحل الدكتور يزيدنا درجات

4-    تعلمت ما اخذ مواد عند دكاترة حريم

5-    تعلمت لازم اطلع من البيت مبجر عشان احصل مسفط

6-    تعلمت ما في شي اسمه قانون منع الاختلاط

7-    تعلمت كل ما اخلص مرحله دراسيه لازم يقولون وااي راح تولهين عليها ولي الحين ما ولهت على ولا مرحله

8-    تعلمت كل يوم غداي من سب واي لانه اكل الجامعه يسمم

9-    تعلمت مافي شي اسمه ممنوع التدخين بالجامعه

10- تعلمت لازم كل كورس حالتي حاله احاتي شنو اخذ مواد الكورس الي بعده

11- تعلمت ال100 دينار الزياده على الاعانه مالها داعي

12- تعلمت لما الطالبه تتأخر عذرها زحمه \ مافي مسفط\ حادث \ حاله وفاة

13- تعلمت الشباب ما يداومون بس اخر السنه الدكتوره تعطيهم A

14- تعلمت بكل ماده لازم نغير موعد الامتحان لانه يصادف عيد !!

15- تعلمت اول 15 دقيقه اذا ما داوم الدكتور اروح البيت اكمل نومتي

16- تعلمت مو لازم انتبه لانه الدكتور بينسى المنهج ويتكلم عن السياسيه

17- تعلمت من اول يوم لما الدكتور يقول لحقوني بتويتر لازم الحقه عشان البونس

18- تعلمت مكتبه الجامعه ازعاج اكثر من بيتنا

19- تعلمت شلون اصحح المعلومه الداثره للدكتور

20- تعلمت شنو يعني قوائم انتخابيه واحزاب وهوشات وتلزق اول اسبوع دوام

21- تعلمت ما اعطي رقمي حق أي وحده من القوائم عشان لا تأذيني

22- تعلمت لما الدكتور يقول كتبوا على فهمكم يعني يبي بالضبط مثل ما اهوا مكتوب بالكتاب

23- تعلمت حتى لو تسكرت الشعبه عادي الله يعافي الباي فورس يعني “بالكويتي غصب عن خشومكم بتسجلوني بالمقرر”

 تقريبا هذا كل الي تعلمته ب17 سنه انتوا شنو تعلمتو بفترة الدراسه ؟😀

12 thoughts on “تعلمت ؟

  1. كل اللي تعلمتيه تعلمناه احنا بعد و وايد وايد وايد عجبني الكلام يعطيج الف الف عافيه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s