ممنوع الاختلاط ممنوع التدخين ممنوع الوقوف

> ممنوع الاختلاط <

مستغربه من هالقانون لانه الجامعه بكبرها مختلطه

بالمحاضرات شباب معانا داشين باي فورس

وبالكافتيريا بعد يدشون يطلبون من ستاربكس وسكند كب وغيره

بسكوير الجامعه الشباب مع البنات 

بالتصوير يدشون مع بعض على انه في تصوير حق الشباب وفي تصوير حق البنات

اللهم الحمام  تكرمون الي  طبعا مافيه شباب-بعد هذا الي ناقص😀

الزبده وين ما نروح بويهنا

انا الي بعرفه من الاساس شفايدة هالقانون دام مو مطبقينه وليش اقروه دام ما عندهم امكانيات كافيه

الي يقهر بفترة التسجيل يبطلون شعب شباب اكثر من شعب البنات ويدرون ان نسبة البنات اكثر من الشباب والي يصير يا انه البنت ادش شعبه شباب باي فورس او يضيع عليها كورس كامل

وطبعا اغلب شعب الشباب فاضيه ان كثروا 10 طلبه هذا طبعا على كلام دكتورتي ولا تقول زين  منهم ان داوموا والبنات وعليه علينا وحده فوق الثانيه مشالله من كثرنا اللهم زيد وبارك

انا اصر واقترح دام بيطبقون منع الاختلاط خل يطبقونه عالمسافط بعد ويسوون لنا باركنق حق البنات

> ممنوع التدخين <

يا كره الي يدخنون وفوقهم علامة ممنوع التدخين !!هالحركه شسميها ؟ قلت ادب, عدم الاحترام للمكان الي اهوا فيه ولا رباده ما يبي يطلع برا عشان يدخن ولا يسوي نفسه ما يشوف اللافتات ترس المكان؟؟

اذا الله مبتليك بالتدخين لا تأذي غيرك والله عيييب 

والله لما ادش القاعه الريحة تكفخ فيني هذا اذا ما صبغت فيني من كثر ما يدخنون والله خنقه

مو ناقص الا يحطون لهم شيشه ويبسطون

طبعا حتى بالمطار والمجمعات مو مقصرين يمشون ويكفخونا بالريحه

لو ريحتها حلوه ما قلنا شي بس الريحه تييب المرض

حرام عليكم رحمووونا حسوا فييينا

> ممنوع الوقوف<

شكو ممنوع الوقووووووف من زووود المسااافط ؟؟؟؟ على ما الطلبة يخلصون محاضرات الا عمي الشرطي مرتز وقاعد يسطر المخالفات

سؤال حق عمي الشرطي:هديت كل المخالفات الي بالشوارع ما ييت الا حق طلبة الجامعه الي مجبورين يخالفون

لي متى على هالحال الطلبه يسفطون اخر الدنيا ويمشون بهالحر على ما يوصلون المحاضره الا ساحوا مساكين واذا كلش من صباح الله خير يقعدون من النوم بس عشان يحصلون مسفط على ما تبدي محاضرتهم الا اهما بسابع نومه

————————

والله عندنا قوانين حلوه بس ليش محد يطبقها وليش ما ناخذها بجديه ؟؟ والي يقهر لما نروح ديره ثانيه نحترم قوانينهم بس بديرتنا نلعب لعب حتى الوافدين تعلموا يخالفون القوانين بسبتنا شافونا ما نمشي عالقوانين قالوا خاربه خاربه اي ليييش شوفوا الدول وين وصلت واحنا وين والله لو نمشي عالقوانين راح نوصل حق الي نبيه بس المشكله كل واحد يمشي بمزاجه

عذروني قرقت وايد بس قلبي متروسه😀

اييييه هاذي الكويت صل على النبي